• 採珠弄銀
  • 2008年06月18日
  • 艱險指數
  • 念慈指數
  • 庵友:住持
  • 修行路線
  • Bookmark and Share

梅窩谷地,其實而家仲有好多銀,多到成幅地圖都係…銀礦灣(或作銀鑛灣),銀礦洞,銀河,白銀鄉,銀灣邨等等,呢d地圖上配有雞乸咁大隻字既地名當然人人都識,但講到銀礦瀑,大家可能無乜印象,就算有印象,好多人都會將佢同瀑布公園既一道頹瀑扯上關係…事實上,銀礦瀑既來頭一d都唔小,佢既地位曾幾何時高到可以同新娘照鏡並列九大石澗以外既三大名瀑(Ka, 1987)。

落左成個晏晝雨,當然又係閒遊賞瀑既好時機。5點幾黎到白銀鄉,沿東梅古道上山,路過瀑布公園,影兩張相繼續上路。

沿窩田村後既水管小路入溯瀑布河,路胚明顯,但蚊蟲蛛網巨量到鋪天蓋地…甫入澗,抬頭一望就係珍珠瀑,水量豐盈,形態獨特,瀑景廣闊,不失為一道出色既前菜。

自瀑左輕鬆上攀,不時停低欣賞一下旁邊既瀑水,發現祁公所言非虛,『水從崖層間翻來復去,彈跳飛躍,仿如萬顆珍珠』。珍珠瀑之上就係是日既主菜銀礦瀑。

銀礦瀑,別名銀龍瀑,飛銀瀑,名副其實既一幅飛瀑,澎湃如遠揚既流水從高越五十尺既瀑台飛瀉而下,瀑花劃出一道又一道完美既弧線,組合成一塊巨大而雄渾既銀白色拋體,氣勢懾人…

賞罷飛瀑,天色漸沉,無落日又無霧燈,而且又開始落大雨,黑夜山洪既話隨時連住持都會駕崩,於是快步沿澗逃離現場出返大路。經瀑布公園漫步落山,研究一下蓮花東麓既蒼龍蓮龍潛龍龍尾水系,結束短短半個鐘既賞瀑之行。

/後傳

翌日,相約左德勤一溯雙龍。難得黎到,時侯尚早,前面尚有幾多的起伏佈滿你一生旅途,再度點遊一下銀礦瀑亦無妨…由橫塘直入奕園上山,重訪瀑布河,今日終於唔駛孤獨探礦。

珍珠瀑。雖然水勢稍減,但流瀑上既萬顆珍珠依然活龍活現。

瀑左上攀,回影瀑下既德勤。珍珠瀑頂既小壺穴。

銀礦飛瀑…

陽光下既名模德勤,十分瀟灑俊朗…

點遊完成,沿路折返,重拾雙龍既正軌。

bkppl

top