• MTB北大刀刃
  • 2008年05月07日
  • 艱險指數
  • 念慈指數
  • 庵友:住持,嘉文,德,堯
  • 修行路線
  • Bookmark and Share

北大刀刃,單車四嶽之西南嶽。與其餘三嶽不同,北大刀刃的傳統單車路線是由兩條分開的車路所組成,至於如何翻越兩條車路之間的小山頭,就要靠真正的MTB了。除了MTB以外,是日更加插了單車剷林環節…=_=

十一點幾到達大埔墟,折騰左一大輪,差唔多一點先成功起行。向粉嶺方向前進,路過波浪橋。

落左波浪橋沿村路踩多陣就可以接返大窩條車路,沿大直路一路踩到尾,去到橋頭。按照今日既計劃先由東北面既墳場大馬路上山,再由東南面既舊軍路滾落山。離開大埔-粉嶺單車幹線,上橋橫過粉嶺公路,轉入橋頭路,直達和合石墳場大門口。

小休一陣就正式開始登山。

唔好講話要推架車上山,三十幾度就咁行上去個人都好易到達沸點…

愈上愈高,景觀慢慢變得開揚,除左可以望到對岸既龍山同九龍坑山,仲可以俯瞰腳下既大窩谷地景色。

最後一段,亦係最斜既一段。上到馬路既最高點(~360m),捨棄馬路沿墳場石級亂咁上山,係咁上,無錯,係要抬住架車上山…

無窮無盡既墳場石級,抬到人都癲…

唔跟大路行亂咁剷上山往往要付出沉重既代價,而今日既代價係…單車剷林…=_=幾經辛苦上到石級頂,望住眼前既山脊大方向繼續推上山,初段都仲有少少路胚可跟,但一過左電塔就知道中計,零路胚不特只,地下仲埋伏住無限既戰壕深坑,一下唔小心隨時會連人帶車碌落坑長眠…幸好林並唔算太密,所以可以採取較為暴力既方法前進。大熱天時抬住架車同個林搏鬥左整整一個鐘,終於上得返山脊大路。

就係咁,零八年五月七日下午三點半至四時半,四名庵友於北大刀刃東北麓成功做出二點八厘米每秒既平均前進速率,破左大會記錄…=_=仲有,由於買送車實在太脆弱,加上我地實在太暴力,住持同德德架車既剎車系統只係淨返三成功能,落山實跌死,恭喜恭喜…

沿大路跨過山坳左轉接返舊軍路尾,當然要踩住架買送車一試MTB…從地圖可以見到,呢條舊軍路其實都好惡下,沒完沒了既omega彎好容易令人偏離航道成為自由落體…

果然,踩舊軍路落山係一件幾恐怖既事,路斜,路爛呢d不在話下,最嚴重係架車無左brake,愈碌愈快,落埋腳都完全減唔到速,仲有,條路既建築風格基本上唔可以用常理去分析,d彎畸型到難以接受,每次未去到最後一秒都唔知個彎究竟係轉左定係轉右,唯有一味靠估,估錯就真係係咁先…=_=

如此聽天由命既玩法真係令人崩潰,高速之下架車經常性地失去控制,只係差幾cm就會撞牆死又或者跌落街死…

驚足三個字,終於成功空降林村谷,個人竟然無穿無爛,實在太感動。

許願樹旁邊既小餐館食t慶祝一番,之後慢慢踩返大埔墟,途中除左嘉文無啦啦炒車倒臥巴士站之外,眾人均相安無事,happy ending。

bkppl

top