• 獨悠澳門
  • 2006年10月22日
  • 艱險指數
  • 念慈指數
  • 庵友:住持
  • 修行路線
  • Bookmark and Share

與香港一海之隔既澳門,除左著名既大三巴,觀音像,媽閣廟景緻真優美之外,仲有唔少值得遊覽既地方。

晨咁早天都未光就要飛過澳門,真係陰功…碼頭搭專車入路環玩樂善盃,22k極速完成。由於參加人數太少,負負碌碌咁拎到個盃,仲有背囊等豐富獎品,唔錯唔錯。

一點幾搭車返到黎漁人碼頭,仲有半日時間玩,應該夠時間黎個走馬看花。先入漁人碼頭閒逛下。

d建築物好卡通,而且仲幾靚幾新淨,但唔知點解入面竟然一個人都無,真係見鬼…

向市中心進發,途中經過新葡京同必勝押。

去澳門一定要入唔同既教堂睇下。去得太多,唔係好記得邊間打邊間…

新馬路係全澳門最旺既地區,但因為要貫徹走馬看花模式既關係,都係陣間返黎有時間先慢慢行。

向西南面進發,首先會經過聖若瑟修院聖堂。聖若瑟修院聖堂又名三巴仔,規模僅次於聖保祿教堂,有二百幾年歷史,係一座漂亮既巴洛克建築。隨意入去睇下,發現入面空無一人,神聖既感覺瀰漫整個空間,扭紋狀既直柱,加上頂部既華麗圓拱,靚到絕。真係我的最愛黎,去澳門記住要入去參觀下。

繼續行程,路過慈幼,入去行左個圈,格局同筲箕灣慈幼差唔多。之後去麵包舖用兩蚊求其買左個包試下,貪佢夠平,入面唔知咩黎,未食過,但非常好食,香港既麵包舖應該好好檢討下。

下一站係主教山,即係西望洋山,上山條斜路好斜,無力既情況下差d跣返落去…山頂風景唔錯,可以望到西灣大橋同旅遊塔。

主教山教堂,幾靚下,唔少情侶特登黎呢度影結婚相,十分溫馨。

落山出海邊,行前兩步就會見到香火鼎盛既媽閣廟。無入到去睇,去左隔離街間鉅記買手信。

沿舊區橫街窄巷行返新馬路,途中經過俗稱水師廠既港務局大樓。

十五時三刻返到黎新馬路,終於有時間慢慢行下。

幫一個乖學生買左支旗,靚。兜完一大輪之後向大三巴方向進發,用四蚊買左一大杯珍珠菊花蜜茶,好飲,但係齋食珍珠真係唔夠飽,於是沿途不斷吸食免費豬肉乾同鳳凰卷,實行同一間舖頭來回試食十次…=_=

澳門地標,大三巴。

大三巴後面既哪吒廟,都有過百年歷史。

穿過大炮台向東面落山,下一個目標係松山。松山又名東望洋山,係澳門半島既最高峰,高海拔九十三米,唔夠手指山高…上到頂會見到東望洋燈塔,同埋隔離既聖母雪地殿。

松山一景。

玩完松山都已經五點幾,係時候放棄北部,行返碼頭算數。出到友誼大馬路,見仲有時間,順便兜出觀音像睇睇。海邊條孫逸仙大馬路真係死城黎,只得小貓三四隻,觀音像就更加鬼影全無,我諗應該係我黎得唔合時…

睇完觀音像繼續沿海邊散步返碼頭,欣賞下友誼大橋既迷人夜景。八點幾終於返到香港,完成澳門一日遊,真係行到腳到爛…=_=

bkppl

top