• 地下城堡
  • 2006年02月04日
  • 艱險指數
  • 念慈指數
  • 庵友:痴和花
  • 修行路線
  • Bookmark and Share

城門地堡,加上下城門峽谷,這短短的路線足以讓愛好尋幽探秘之士玩上一整天。

葵芳會合和花,安蔭停車場上山,沿山脊小路穿過三個電塔而上。行行下無啦啦有一大群野狗近距離亂竄,以為佢地會將我地包圍之際,發現原來佢地只係做緊自己野,根本無理會過我地…

接上麥徑,回望返頭先電塔個脊,旁邊既坑谷頗為直削。

行前兩步已經進入城門地堡既範圍,先入指揮部參觀一下。指揮部一段比泥塞住左,行唔到,都係由主入口開始玩。

每段地下戰壕都有自己既街名,好似牛津街,攝政者街等等。每條戰壕尾都會有一組機槍堡,但大部分都已經比日軍炸到爛晒。

經典既三岔口。

到達最後一組機槍堡,編號四零三,唔知點解條地下戰壕既出口比人刻意改裝成拱門狀。

咩黎架…一下唔為意真係比佢嚇親…

完成晒地堡所有通道,返到去主入口,唔覺唔覺原來玩左個幾鐘。主入口既標記,『若林隊占領』,手工精美到唔信,但暴露到咁遲早比d反日情緒高漲既晨運阿伯鑿爛,希望正苦做返少少野保護下呢幾隻字,唔該晒。

…=_=

玩完地堡之後出城水,三百級落壩底,腳都無…爬落鐵梯,經過溢洪碗出口,沿乾澗一路落。

雙城石澗係大城既延續,所有野都比大城更加巨大,其他澗根本唔可以匹敵。行行下會去到一個峽瀑既位置,雙城石澗主瀑,夏天大水既時候會形成一個極為洶湧既落差位,只能夠用瘋狂黎形容。

轉個彎已經到塘底,進入下城門峽谷段。塘底真係乜都有,下次可以黎玩下尋寶遊戲…

經過城隧橋底,繼續落。

峽谷中央有時會積左水或者濕泥,唯有走上兩邊碎石坡橫移避過。由於峽谷實在大深大斜,而且水性風化嚴重,要咁樣橫移法都有一定既難度。

沿住彎彎曲曲既峽谷前進,感覺非常好,中央既草地,兩邊既爛泥,再加上三個爛人,簡直係絕配。

行到水塔既位置差唔多掂到水,沙石地,青草地全部變成泥漿,係時候逃走。

但係要退並唔容易,因為兩邊又斜又碎,研究左好耐,只有右邊前少少既一個坑位有機會突破,上唔到就係咁先…先攀上右邊石河,d石碎到離譜,上到一半之後小心橫移一段,再繼續沿右壁上攀,手腳位尚算可以。眼見終點在望,臨到馬路之前幾米竟然仲有一排荊棘,無言…=_=

被困了…呢個時候,無意中發現左坑位既渠口,一個狗窿大小既渠口。諗都唔諗即刻趴入去,用行軍模式慢慢典,成功從另外一邊屈上馬路,贏左…好一記絕處逢生,最後經下城門道出大圍完成。

bkppl

top