• 舂坎角
  • 2007年10月18日
  • 艱險指數
  • 念慈指數
  • 庵友:流,曉,童,德勤
  • 修行路線
  • Bookmark and Share

舂坎角,一般可以被解讀為舂坎灣篤既沙灘,或者赤柱以西既高尚住宅區,又或者赤柱灣同舂坎灣之間既半島,但以上三者全部都唔係正解。叫得做舂坎角,當然係一個角黎,港島南岸既一個小岬角…

人生最後一次學校鴨仔旅行,除左綑邊真係諗唔到有咩好做…=_=出門口廿分鐘直抵赤柱會合一眾鴨仔,簽一個到後立即四散,橫越赤柱市集向舂坎角方向逃去。早上十時半,眾庵友抵達舂坎角沙灘,瑤林長老決定留守大本營幫我地睇住d行李,謝謝你。輕裝起步,逆時針向舂坎角綑,先黎一段水管棧道。

棧道之後係一段典型既花崗岩亂石海岸,海倫德勤呢d滋事分子當然唔會放過任何一個搞事既機會…

無甚可賞既石春灘,快步完成。

石春灘後會見到一座龐大既木製建築物,從佢既外形同結構黎睇,可能係一個大型罾棚加望魚台。路過罾棚後正式進入岩岸段,先黎一塊大波板,斜度唔大,只得四十度左右,而且摩擦力系數極高,手腳位良好,無甚難度。

沿波板橫移到尾,緊接既係一個大型海蝕平台,靚。但由於波板末端突然變成直壁,要下降至海蝕平台亦需要一番功夫,仲要小心波板同海蝕平台之間既零摩擦力石坡。

平台上肆意奔跑既感覺非常好,不知不覺已經黎到慈氏建築既下方。平台前方有一間廢棄水泥建築,之後既岩岸再次變成波板狀。

踏上波板之前遇到一個騎呢位,一塊阿寶佢六尺高既直壁,手腳位有點兒勉強,兜山路既話要硬食荊棘,海倫嘗試從外繞過亦落得掛臘鴨既下場,最後要利用人工手位通過…呢段波板明顯比之前一段user-unfriendly,斜度稍增,更有唔少弓背狀,騎樓狀之類既部份,一下唔小心真係會黎個飛輪海…

他一直在堅持,他一直在玩命…=_=

最後一段,要沿住壁底石坡橫移,可行既位置只係淨返兩,三尺,要小心地滑之餘更要小心身邊既浪花一朵朵…呢個時候,我地既好朋友藤壺終於登場,將摩擦力系數由零提升至無限,非常好。穿過騎樓石底,到達舂坎角極地,前面出現一座方形石塔,實在係拍造型照既好地方。

賞罷石塔,順道一遊傳說中既張保仔洞,個人覺得無乜特別,普通海蝕隙一條。相傳洞內有秘道可以通去馬坑天后廟,信不信由你…沿密林小路剷返上炮台,回到文明。

最後沿舂磡角道離開,途中不幸遇上怪物,四名庵友全部陣亡,全卷完…=_=

bkppl

top