• 輕舟斬竹灣
• 2007年06月19日
• 艱險指數
• 念慈指數
• 庵友：米痴
• 修行路線
• 

＊難有米人有興，當然要同佢出艇享受下二人世界。閒遊下斬竹灣附近既三個好地方；北潭涌，曝罟灣，以及大網仔。

＊晨咁早入去搵冷雷，如我所料，今日無其他人入黎玩艇，非常好。單對單教學，前槳後槳掃槳之類，米人亦好快上手，十點半可以出發入北潭涌。

＊今日朝早又係二點五，撐得好放心，零擱淺既情況直入大網仔路。忽發奇想，搵次搬架艇入去玩下小亞馬遜應該會幾出色…=_=

＊抖左一陣撐返出去，波平如鏡，落槳一刻產生既水紋真係極靚。時候尚早，不如去埋曝罟灣。懶人有懶人既玩法，諗都唔諗就捷徑模式，直接取道黃宜洲水道。天真地以為二點五真係大晒，結果都係不斷咁擱淺…

＊曝罟灣係擺頭墩西面既一個小海灣，特徵係有一個扇形廢棄魚塘，圍壆又長又圓，中間仲有幾道閘門可以穿入去。水位太高唯有放棄穿門，轉移目標入灣篤既紅樹林。

＊紅樹林十分繁茂，撐船仔穿黎穿去體驗下生態旅遊，感覺非常好。

＊再見曝罟灣，返基地食飯。

＊下晝依然係自由活動，近近地撐過隔離大網仔，比米人再熟習下所有一星技術。沿大網仔水道直入，右邊就係西貢戶外訓練營。去到盡頭加插獨木溯澗環節，下場當然係擱淺…

＊繞過涌口既沙咀，撐入另一邊既小支流，無幾耐已經擱淺要出返黎。細賞下沙咀上面既雀鳥，草地，紅樹林，十分寫意。

＊最後回到ayp，完成一日輕舟之旅。