• 崗碧自擁
  • 2005年05月21日
  • 艱險指數
  • 念慈指數
  • 庵友:住持
  • 修行路線
  • Bookmark and Share

200毫米,絕不能浪費,近近地閒逛一下大潭水系。

晏晝出發,一出門口即刻由雨轉晴,唔錯。壩頭落車,下路入潭崗飛瀑,條路果然變左大澗…輕鬆下降潭崗飛瀑,今日水唔算太大,但瀑態一流,瀑花畫出一條條完美既弧線,再加上面前碧玉般既翠潭,以及四周傳來既立體瀑聲,此情此境實在非筆墨可以形容。

賞畢飛瀑,下路過塘尾,由於而家只係初夏,水塘水位好低,索性直剷落橋底入澗。

一入澗即刻出現一連串急流,好在條澗夠闊,兩邊仲有好多位可以行。過澗就麻煩少少,但只要睇位夠準,落腳夠狠就絕對沖你唔走。睇黎二星已經係雙潭既極限…

過埋段小平流就到戲玉,先黎一個碧水潭,潭後面既飛流相當澎湃。

碧水潭以上為一個綿長既落差位,可粗分成三段。第一段澗床左高右低,右邊形成洶湧狹坑飛流。左邊輕易攀上飛流頂既寬闊平台,眼前出現既係第二段落差,碧水灘。

碧水灘係一段石坡狀既廣闊澗床,全港獨一無二,氣勢非凡,流水散落既形態堪稱一絕。平時左中右三路都可以上,今日都係左邊大路算數。

碧水灘頂緊接半葉潭,潭後面就係最後一段落差,半葉瀑。半葉瀑呈倒s形,無水既時候中間任上,今日要貼住水邊上都幾乎無可能,乖乖地入林吧啦…

副塘壩底離澗,上塘引水道直入渣大,全澗唯一景點就係呢幅渣大瀑。

極速搞掂渣大,離澗上陽明山莊,開始烈日登山之旅,經渣甸山,小馬山,寶馬山出賽西湖落北角t模式。

/後傳

一星期後,麒哥邀請我再同佢玩多次,我見佢咁有熱誠,無理由拒絕人地一番好意…

潭崗飛瀑。

為左貫徹閒遊既宗旨,決定唔玩雙潭,男路直上副塘玩下魚仔算。

藍刀,金山則。

玩到夠皮,經上塘上大風坳,再沿柏架山道落山,成條馬路毛蟲滿天吊,一下唔小心隨時搞到成身都係。行行下仲執到名貴腕錶一隻,橫財認真就手。管理站穿飯堂落孖池,順手入柏則攤抖返陣。

就當我未玩夠,轉上鐵梯棧道接晨運徑東行,最後落耀東坑極速完成。

bkppl

top