• 彌昂飛行
  • 2008年06月28日
  • 艱險指數
  • 經典指數
  • 庵友:飛行員流邦,飛行員張曉,飛行員德勤
  • 修行路線
  • Bookmark and Share

二零零八年六月,對於香港人黎講,係一個好經典既月份。

成個月甲埋得三兩日見到個天,總降雨量達1346.1毫米,係有紀錄以黎最高,正常雨量既3.5倍,挪亞方舟都幾乎要出動…全月一共出現過九次黃雨,五次紅雨,一次黑雨。

而六月七日既一次黑雨,史稱世紀大黑雨,歷時足足四個幾鐘,除左將天文台既每小時降雨紀錄推高到145.5mm/hr,更加令大嶼山短短一個朝早落左超過400mm雨、北大嶼山公路水深沒頂、東涌道被洪水吞噬嚴重損毀、羌山道被山泥切斷、大澳由水鄉變成泥鄉、三龍峽被巨石填平、龍嚎只餘下龍嘯崖、西狗牙坑變成西狗泥坑、貝徑金腰鳳四等山徑永久封閉…

風神掠過香港後,留低既係連日暴雨,貫徹左呢個六月天既天氣…見天氣稍為好轉,決定造訪昂深一睹彌昂千層兩大名瀑既風采,順便視察下經過世紀大黑雨洗禮後既大嶼山。

東涌起步,沿東大古道直入深屈,一起步就灑左一場大驟雨,連d咩彌鱟飛瀑都出埋黎。悶足10k,終於黎到深屈。

舉目深屈灣,深感世紀大黑雨既威力…海面上鋪左一層新鮮既浮泥,上面佈滿住一舊二舊既巨石,同埋一棵二棵連根拔起既大樹,明顯係暴雨當日由深屈水系既上游沖落黎…正值中午,入士多食左碗唔錯既麵補充一下。聽d村民講,雖然有大大條深屈引水道做盾牌,但黑雨當日澗口附近既農田依然比山洪徹底消滅左…

食完麵再度開動,雨過天清,仲感覺到太陽既存在,非常好,真係龍潭老鼠。轉上深屈道,望過對面蓮深左澗呢d澗仔都變得澎湃起來。

左轉封閉左既引水道,周圍都係暴雨肆虐既遺骸,成條引水道爛晒,好多工人搶修緊…

行行下成條引水道變左堰塞湖,原來係比山泥淹沒左…翻越爛泥,真係別輕視佢,因為爛泥之後迎面而來既仲有一片廣闊既泥漿,十分嘔心,一下唔小心就會slide落泥漿變成史力加…=_=

黎到昂深水壩入澗位,條橋比山洪帶落黎既石頭密鋪平面,實在太誇張…=_=

寬闊既昂深下游。歷盡艱辛,終於成功入澗。

入澗,今日水量頗大,而且,澗貌改變左唔少,周圍多左好多亂石枯樹,提升左條澗既難度。

去到一個闊瀑位,前無去路,格局十分凌亂,搵唔到正路既情況之下唯有左邊殺林而上,真係密到錨mu,枯枝,爛泥,荊棘,貼近根部仲有好多蟻…結果都係要住持出馬,搞左幾個字先成功越過此瀑…

入返澗沖洗一番,繼續做三文魚,小心翼翼逆流而上。

守望相助…

彌昂飛瀑前既一段澗道比較寬廣平坦,雖然水量沛大,但可以避重就輕從旁從容越過。

難得見到咁新鮮既石塊,仲未滿月架…轉個彎,前面唔遠既地方出現一幅非常澎湃既水簾…

彌昂飛瀑…眾庵友完完全全比佢既氣勢懾住…

彌昂飛瀑瀑高數十尺,再加上六月份1xxxmm雨量既功積,這就是做人,這就是氣勢…

沿瀑左濕身上攀,不時駐足觀賞一下身旁難以一睹既飛瀑絕景,氣勢真係強勁到無話可說…

瀑頂平台小休,再次灑起雨來…

見時間許可,決定等到驟雨過後先繼續上溯。就係咁,出事喇…住持開始意識到,今次自己真係棋差一著…人算不如天算,誰能體諒我的雨愈落愈大,完全無停落黎既意欲…氣氛變得認真、嚴肅,擺脫庵活動一向既閒情逸緻同率性玩味,大家都作好最壞打算,準備迎接山洪既來臨…憑住咁多年黎閱過山與水既經驗經審視一番,發現澗邊既一片平緩疏林形勢尚算安全,進可攻退可守…既然搵到暫時安全既容身之所,咁就當然唔好再冒險隨便四周移動啦,留低觀察一下再作打算…

未己,流水變得異常混濁,水位急升,洪峰終於來臨…雖然以住持經歷過既咁多次山洪黎計,呢次都未算太毀滅性,但論到無助既程度,今次真係第一位…我地再次創造歷史:二零零八年六月二十八日,有三名自視過高既庵友被困昂深石澗彌昂飛瀑頂…由疏林望出去,只見洪水十分強勁,將瀑頂既廣闊平台完全淹沒…

雨已停,洪峰已過,洪水開始退卻,但等左個幾鐘水量仍然未降到一個行澗-able既水平,而且天就快黑,遠離文明,為安全計,唯有屈服…拎起電話,一條九…兩條九…三條九…呀…

『喂…係…我地被困呀…三個…彌昂飛瀑…即係…昂深呀…係呀,一條石澗黎架,由昂坪流落深屈架…咁…唔…986,646…有幅大型瀑布,有個跌水潭…瀑布頂既位置…係…唔駛喇…唔駛消防員喇…直昇機就得架喇…係呀,消防員上到黎都無用架…都唔駛喇…我地無受到傷…我地一路都好安全,除左被困之外應該唔會有咩即時危險…係呀…澗邊樹林好安全架 …真係唔需要消防員喇,飛行員就得架喇…係呀…係,我地唔會郁…真係唔好意思…唔該晒…』

大概六時一刻半,一架harry potter發現左我地。獲救之前,少不免要硬食一下佢既強勁氣流…達颶風程度既垂直風切令我地變成螻蟻,痴住枝樹枝動彈不得,任憑我地唱幾多句停住這風oh baby長夜抱擁oh darling都無用…飛行員徐徐下降,預備左一舊裝置比我同張曉,二人先行升天…呢個時候,心中響起一首陳年舊歌:心底之中知分寸,得失差一線…

緊隨其後既係德勤,同埋幫我地拎晒d背囊既飛行員哥哥,謝謝您…開展極速既彌昂飛行,一世人一次當然要好好珍惜…從高空鳥瞰,一道道新鮮既泥疤,咆哮中既千層瀑,仲有背後既鳳凰山,如斯美景實在難以忘懷…

短暫而精彩既航程結束,腳踏赤鱲角機場,一路行一路比飛行員二號嘲笑我地著涼鞋出山既行為…返回室內,冷靜地同警察叔叔備一下案,默然離去,搭公車返東涌夜宴,回味一下今日既經典旅程,檢討一下自己以身犯險,浪費警力既行為…

Chang(2008):今天的行澗部分只進行了一個小時半,有點遺憾。但這樣的天氣真的非常不適合行澗,以後也不會在這樣的天氣下行澗。對於浪費了警力,再次說句對不起…

NianCiAn(2008):第一.安全第一。難,是主觀的;險,才是客觀的,勿因自視主觀而低估危險性…第七.命懸一線的情況,一生人經歷一次就夠了…十一.在適當的時候做適當的事。春夏迴步翠谷洗滌心靈,秋冬不妨窮山之高而止。

最後,謹代表各位愛惜生命既庵友呼籲大家:顧己及人,切勿以身試法!

bkppl

top